O astrónomo galego máis importante do século XX. Foi pioneiro na investigación astronómica en Galicia e o primeiro en estudar as estrelas dobres no Estado español. Construíu o primeiro observatorio astronómico de Galicia en Lalín e fundou o Observatorio Astronómico da Universidade de Santiago. No seu haber conta coa descuberta de catro estrelas dobres e unha extensa produción científica entre a que destaca a súa magnífica Introducción a la Astronomía, libro de referencia na universidade española durante moitos anos. Foi ademais un dos precursores do uso da lingua galega na ciencia e o primeiro en empregala en astronomía nos seus ensaios publicados na revista Logos.